الناس طلعوا القمر واحنا قاعدين بنتخانق نتوضي ازاي

الناس طلعوا القمر واحنا قاعدين بنتخانق نتوضي ازاي

ساعه اما وزاره الصحه في بداية موضوع الكورونا خالص ده قعدت تناشد الناس بغسل الايدي، واحنا كلنا كنا مستهترين بالموضوع وطلع عليه كوميكس، لغايه اما ابتدينا نشوف الناس بره بتقول اغسلوا ايديكم بالصابون اهم حاجه

وابتدت الناس تتسائل "ازاي نسغل ايدينا" رغم انه فعل بدائي جدا المفروض نكون بنعمله على الاقل بعد كل اكله، وطلع فيه فيديوهات لتوتوريالات وصور وشرح وطرق مساعده تغني ايه وانت بتغسل ايدك "عشان تغسل ايدك صح"

واتريقنا على موضوع ال 20 ثانيه، لغايه اما جت فيديوهات بتوضح علميا، ليه 20 ثانيه وايه علاقتها بتفكك بروتينات الفيروس عن بعضه مع الصابون وده الي بيخليه يروح

وانه بمجرد ما بقى عندنا "علم" ابتدينا نتبع الخطوات فعلا، وبقينا نرش الكحول "ال70%" مش اي كحول زي ما كنا بنرش اي كلونيا على الجرح زمان بغض النظر هي كام في الميه كحول عشان نطهر الجرح

بتخيل لو كنا في عصور زمان جدا، وكنا من غير علم وانتشر وباء زي الكرونا، وكنا هنتعامل معاه عادي، من غير كمامه ومن غير غسيل ايدي والناس تموت عادي واحنا مش عارفين بنموت من ايه، لغايه اما حد يكتشف

بمناسبه موضوع الكمامه، حتى دي فيها علم : انها تتلبس 8 ساعات تقريبا في كمامات بفلتر وانواع ..كله مبنى على معلومه جاتلك من حد بتثق فيه

رغم ان الفيروس ده تقريبا احنا مبنشوفهوش ولا بنشوف طريقه عدواه، بس عندنا علم يقيني بوجوده بعد استدلال علاماته (وهنا هتفتكر اني كاتب البوست عشان اقول ياااه الاله موجود وكده)

بس مش دي النقطه، النقطه اني كنت من الناس الي بتشوف زمان فكره "الرفاهيه الفقهيه" بتاعت ان الناس قاعده بتتخانق مثلا تتوضى ازاي، وتسبغ الوضوء ازاي، وتغسل هنا او متغسلش هنا ولو مغسلتش هنا ينقض الوضوء

وفكره العوره، ومش العوره

وفكره ليه اصلا بنصلي 5 صلوات، وليه بنسبح بالعدد المعين ده ؟، وليه الصلوات في التوقيت دي

كل ده احنا معندناش "علم" الاساسي بتاعه، احنا عندنا "خبر" لو انت مؤمن وعلى دين الاسلام فالي انت مستلم منه الخبر وهو الرسول عليه الصلاه والسلام وانت متيقن انك مستلمه من الله، فانت بالتالي بتثق في الله ، زي مانت بتثق في الطبيب وهو بيقولك ان ال"كحول ال70 في الميه" هو الي احسن في محاربه الفيروس، مجبتش فايروس وحللت بنفسك

فكانت الخناقات بتاعت "الناس طلعوا القمر واحنا قاعدين بنتخانق نتوضي ازاي" طلعت خناقه مهمه، خصوصا في زمننا الحالي، لمجرد ان بقى عندنا "علم" ان طريقه غسل الايدين مهمه في قد ايه ممكن تمنع المرض

بالتالي كل ما هو تكليفات الهيه احنا مكلفينها بدون ما "نعلم" الهدف منها ايه،

زي ليه بنصلي العصر، ليه المغرب 3 ركعات، ليه كل التكليفات الدينيه بنعملها

رغم غياب علمنا (وخصوصا مع محاولات بعض الناس الغيورين على الدين يخترعوا اسباب علميه لعباده الله، ويتش از انا الصراحه بحسها من اوحش الحاجات الي ممكن تعملها لدينك، لانك كده مش مؤمن بيه، انت عايز دليل مادي ملموس محسوس وهو متعارض مع فكره الايمان بالغيب، وكانك بتعبد الله على السببيه، فبالتالي لو السببيه الي انت شايفها زالت او مشيت او اتغيرت اتغيرت عبادتك)

مش هتدخل في المشيئه الالهيه فيما انا اسميه "الموديل الالهي" الي ربنا حاطه لعباده عشان يعبدوه، لاني بردو عمري ما هعرف الحكمه منه عشان انا "معنديش علم"

ولكن اجواء بسيطه زي الي عايشينها حاليا، ورغم تفاهات حاجات كتير زي طريقه غسل الايدين، تخليني مستهونش باوامر الله مهما كانت مش مفهومه بالنسبه لي

صحيح هفضل ادور على اصولها واحكامها الصحيحه لان للاسف في ناس كتير بتخلط رؤيتها الشخصيه في احكام الله وبتنفذ رؤيتها على انها حكم من احكام الله، لكني اقدر كل ده في جمله صغيره جدا

ان ربنا محطش تشريع مهما وان كان دقته صغيره جدا الا لصالح البني ادم لنفسه

وده ربنا اخبرنا بيه صريحة مرتين ، مره كان بيخاطب سيدنا محمد انه يبلغ الناس، في الايه 108 في سورة يونس :

قُلْ يَا أَيُّهَا النَّاسُ قَدْ جَاءَكُمُ الْحَقُّ مِن رَّبِّكُمْ ۖ فَمَنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۖ وَمَا أَنَا عَلَيْكُم بِوَكِيلٍ

ومره صريحة في الايه 15 من سورة الاسراء :

مَّنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۚ وَلَا تَزِرُ وَازِرَةٌ وِزْرَ أُخْرَىٰ ۗ وَمَا كُنَّا مُعَذِّبِينَ حَتَّىٰ نَبْعَثَ رَسُولًا

الحقيقه انا بتكسف من ربنا في كل مره بتأمل فيها في قضاءه وقدره

 

اتمنى من الله ان يتوفاني وهو راض عني.

 

 

هشام عفيفي

أعجبك المقال , قم بالان بالاشتراك في النشرة البريدية للتوصل بالمزيد

    التعليقات

    عن الناشر

    Molkhsat

    نبذة شخصية

    مقالات حالية

    أخبار

    طريقة الحفاظ على بطارية الهاتف

    أخبار

    نصائح قبل شراء لاب توب مستعمل